Hai unos díes dábemos anunciu a una esposición de mazcaraes, esposición de la que se fai ecu’l diariu dixital Les Noticies. Damos l’enllaz a la noticia y trescribimos darréu’l testu porque amplía la información qu’asoleyáramos yá nesti blog:
La Casa de los Valdés, del Muséu del Pueblu d’Asturies, en Xixón, va acoyer, hasta’l 30 de setiembre d’anguaño, la esposición Mázcara ibérica, organizada pola asociación Progestur, dedicada a la promoción del turismu cultural ibéricu. Nella van poder vese imáxenes de les mazcaraes más representatives del noroeste de la península y les comunidaes del Cantábricu. L’actu d’inauguración va ser el vienres 15 de xunu, a les 13 hores, y nél van participar Carlos Rubiera, conceyal de Cultura del Conceyu de Xixón; Xosé Nel Riesgo, director de la Fundación Municipal de Cultura, Educación y Universidá Popular; Eduardo Martínez Llosa, alcalde de Siero; y Helder Ferreira, comisariu de la muestra y presidente de Progestur.
La esposición Mázcara ibérica compónla una escoyeta de cincuenta fotografíes de delles fiestes portugueses y españoles onde participen mazcaritos. De Portugal van tar representaos Os Caretos de Lagoa, en Mira, averao a Coímbra; Os Cardadores de Vale de Ílhavo, cerca d’Aveiro; A bugiada de Valongo, nel distritu d’Oporto; l’Entrudo de Lazarim, nel conceyu de Lamego; o les mazcaraes d’Iviernu nel nordeste tresmontanu. Tamién hai imáxenes de dellos entroidos de la provincia d’Ourense –como los de Xinzo de Limia, Verín o Manzaneda–, los antruejos de Llión –colos toros de pueblos como Velilla de la Reina o Llamas de la Ribera, pegando cuasi con Asturies– y dellos carnavales de les provincies de Zamora y Cáceres –onde se llamen jarramplas y carantoñas.
Los países del Cantábricu van tar representaos polos carnavales d’Alsasua, na Comunidá Foral de Navarra; La Vijanera, que se celebra nel llugar de Silió (Cantabria); y Os Reises d’El Valledor y Tormaleo, los Sidros y la Comedia de Valdesoto, o’l Guirria de Ponga, toos ellos n’Asturies.
Pero, amás de los retratos, na esposición allugada nel Muséu del Pueblu d’Asturies van mostrase los traxes de dellos de los personaxes más representativos d’estes mazcaraes, como los que participen nel antroxu de Lazarim –con caretes de madera y traxes fechos de pelleyos d’oveya o fabaraca–, l’osu y el zamarraco de La Vijanera –esti últimu con campanos colgaos del pescuezu, per delantre y per detras, que pesen en total 40 quilos–, los cardadores d’Ílhavo –con tocaos de cintes de colores bien llamativos–, un sidru de los que desfilen per Valdesoto o’l traxe completu del Guirria –personaxe que sal el primer día del añu en San Xuan, la capital del conceyu de Ponga–.
La posibilidá de contemplar en Xixón estos mazcaritos ye, en bona midida, por mor del empeñu de l’Asociación pola Recuperación de los Sidros y les Comedies de Valdesoto, que llevaben años intentando trayer a Asturies una esposición d’estes característiques. Pablo Canal, ún de los miembros d’esta asociación, ta enfotáu en que la muestra tenga «una influencia positiva nel procesu que se ta viviendo nel país de recuperación d’estes fiestes» y destaca «lo guapo que ye ver qu’hai tantes celebraciones asemeyaes a les nuestres». Canal cree que’l veles en Xixón pue animar a la xente d’Asturies a retomar unes mazcaraes que tán, «más que perdíes, dormíes», señala.
Antropología en Asturias / Antropoloxía n'Asturies 