Apurrimos nueves noticies sobre les escavaciones en Sidrón, sacaes del diariu dixital Les Noticies, onde podéis consultar la fonte orixinal. Trescribimos l’artículu darréu:
L’equipu d’investigadores de la cueva de Sidrón topó 25 restos óseos nuevos d’individuos neandertales na última campaña d’escavaciones nel xacimientu prehistóricu, ente ellos parte d’un craniu. Trátase de parte del güesu occipital d’un individuu inmaduru, según esplicó’l director de les escavaciones de Sidrón, Marco de la Rasilla, que destacó la relevancia d’esti descubrimientu porque les buelgues del celebru nel craniu puen ufrir «información interesante».
Nesta ocasión, sicasí, nun s’atoparon restos dentales, anque sí se llograron, como en campañes anteriores, dellos tipos de restos óseos y exemplos d’industria lítica (producción de ferramientes de piedra). Asina, una vez que se llimpien los restos va poder sabese si pertenecen a dalgún de los 13 individuos de los qu’hai constancia hasta la fecha na cueva, asitiada en Piloña, al traviés de los más de 2.100 restos óseos atopaos.
El director xeneral de Patrimoniu Cultural, Adolfo Rodríguez Asensio, incidió en que’l Gobiernu caltién el so apueste por esta investigación al traviés del alcuerdu vixente cola Universidá d’Uviéu y que va siguir, polo menos, pa les campañes del 2013 y 2014. Pa ello, el Gobiernu va contribuyir con unos 220.000 euros a partir ente dambos exercicios en función de la previsión técnica d’actividá.
Respecto al proyectu museísticu de Sidrón, Rodríguez Asensio reconoció que la crisis económica enzanca’l so desenvolvimientu. Sicasí, afirmó que «nun ta paráu» sinón que «ta aparcáu» y que cuando pueda desenvolvese va facese rellacionándolo «col discursu científicu», pensando nel conteníu más que nel continente.
Antropología en Asturias / Antropoloxía n'Asturies 