Esposición de la Mázcara Ibérica

Güei anunciamos una esposición futura nel Muséu del Pueblu d’Asturies sobre la Mázcara Ibérica. Na páxina web del Muséu nun apaez referencia nenguna a esta esposición. Cuando tea perfilada y se dea anunciu, tamién lo pondremos nel blog. De momentu, ye la prensa dixital n’asturianu la que se fai ecu de la noticia. Atopamos en Asturies.com la siguiente nota de Pablo R. Guardado:

Nel aconceyamientu de la Rede Ibérica de la Mázcara, celebrada’l sábadu en Zamora, confirmóse que’l Muséu del Pueblu d’Asturies va acoyer una Esposición de la Mázcara Ibérica. Ésta va ser d’envergadura y va tener llugar en branu. La esposición, que yá visitó Lisboa, Zamora y Porto, ta entamada pola Asociación para la Promoción, Desarrollo y Gestión de Turismo Ibérico (PRODESTUR) y llega a Asturies tres alcanzar un alcuerdu cola direición del Muséu del Pueblu d’Asturies gracies a la intermediación de l’Asociación pa la Recuperación de Los Sidros y Les Comedies ‘El Cencerru’, de Valdesoto. Cola so llegada al país, los asturianos y los munchos turistes que visiten les instalaciones museístiques del marxe derechu del ríu Piles van poder conocer a fondu les mazcares ibériques que tovía sobreviven en dellos pueblos de Asturies, Galicia, Portugal, Lleón, Castilla y Extremadura al traviés de semeyes, videos, traxes y los utensilios que lleven dalgunes d’estes mázcares.

Pese a que todavía nun tán zarraes les feches, yá se conoz que la esposición va abrir les sos puertes pa finales de mayu y que va tar a disposición del públicu hasta últimos de setiembre. Amás, alredor d’ella ta previsto la celebración d’actividaes nestos meses, como pue ser la visita de dalgún grupu de mazcaraos de fuera del país, actividaes folclóriques o dalgún otru tipu d’eventu rellacionáu coles mazcaraes tradicionales.

Xunto a la confirmación de la visita d’esta esposición basada nel Volumen II de Mázcara Ibérica, na reunión de la Rede celebrada’l sábadu nel Hotel AC Zamora, tamién se faló de la situación actual de la mesma, pendiente de la entrada de delles instituciones pa echar a andar de manera definitiva. Amás d’El Cencerru, la representación asturiana nel aconceyamientu tuvo formada polos otros dos grupos que viaxaron a Zamora a participar nel Festival de la Máscara Ibérica –Os reises de Tormaleo y Os reises del Valledor–; María Nachón, conceyala de Cultura del Conceyu de Siero; Nuria Rigueras, conceyala de Cultura del Conceyu d’Ibias; y l’historiador Ángel Mato.

Otra fonte d’esta noticia ye Lesnoticies.com, y nesti casu ye Iván G. Fernández el que firma’l testu que sigue darréu:

«La Rede Ibérica de la Mázcara, qu’aconceyó’l 1 d’ochobre pasáu en Zamora, alcordó facer una esposición sobre la mazcarada nel Muséu del Pueblu d’Asturies ente los meses de mayu y setiembre del añu 2012. Na xunta participaron dellos representantes d’Os reises d’El Valledor, Los Sidros de Valdesoto y Os Reises de Tormaleo. Amás, tamién participaron la conceyala de Cultura de Siero, María Nachón; la conceyala de Cultura d’Ibias, Nuria Regueras; y l’historiador asturianu Ángel Mato».